ප්‍රවීණ රංගන ශිල්පිනි මාලිනී ෆොන්සේකා මහත්මියගේ අවසන් කටයුතු රාජ්‍ය ගෞරව සහිතව නිදහස් චතුරශ්‍රයේදී පැවැත්වෙන බව සංස්කෘතික කටයුතු අමාත්‍යවරයා පවසනවා.
ඒ අනුව, ඇයගේ අවසන් කටයුතු මැයි 26 වන සඳුදා දින සිදු කරන බවයි සඳහන් වන්නේ.
අභාවප්‍රාප්ත මාලිනී ෆොන්සේකා මහත්මියගේ දේහය මැයි 25 ඉරිදා පෙ.ව. 10.00 සිට ජාතික චිත්‍රපට සංස්ථා පරිශ්‍රයේ තරංගනී ශාලාවේදී මහජන ගෞරවය සඳහා තැන්පත් කරනු ලබනවා.
“ශ්‍රී ලාංකේය සිනමාවේ නිළි රැජින” ලෙස හැඳින්වුනු මාලිනී ෆොන්සේකා මහත්මිය අද උදෑසන කොළඹදී අභාවප්‍රාප්ත වූ අතර, මිය යන විට ඇය 78 වන වියෙහි පසුවුණා.
