මේ වන විට දිවයිනේ බොහෝ ප්‍රදේශවලට පැවති වර්ෂාපතනයේ අඩුවීමක් සිදු වුව ද මෙතෙක් නාය යෑමේ අවදානම පහව ගොස් නොමැති බව ජාතික ගොඩනැගිලි පර්යේෂණ සංවිධානය පවසනවා.
ඒ අනුව පැවති වර්ෂා සහිත කාලගුණයත් සමඟ පස සංතෘප්ත වී උපරිම අවස්ථාවට පැමිණ ඇති නිසා, නාය යෑම් තවදුරටත් සක්‍රීය මට්ටමේ පවතින බවයි එහි නාය යෑම් පර්යේෂණ අංශයේ අධ්‍යක්ෂ ගාමිණී ජයතිස්ස සඳහන් කළේ.
මෙම තත්ත්වය වර්ෂාව පහව ගොස් දින 3 ක් පමණ පැවතිය හැකි නිසා බෑවුම් ප්‍රදේශවල ජනතාව මේ සම්බන්ධයෙන් දැඩි අවධානයෙන් පසු විය යුතු බවයි ඔහු ප්‍රකාශ කළේ.
එසේම නාය යෑම් ප්‍රදේශ නැරඹීමට යෑමද අනතුරුදායක බවත්, වර්ෂාව පහව ගොස් හොඳින් හිරු එළිය වැටී සංතෘප්ත වූ පස යම් මට්ටමකට වියළී යන තෙක් මෙම අවදානම පවතින බවයි ගාමිණී ජයතිස්ස වැඩිදුරටත් ප්‍රකාශ කළේ.
