“දිට්වා” සුළි කුණාටුවෙන් පසුව ඉන්දුනීසියාවට සහ ශ්‍රී ලංකාවට බලපෑ දරුණු ගංවතුර තත්ත්වයෙන් පීඩාවට පත් වූවන් සඳහා, දෙසැම්බර් මස අවසානය දක්වා ස්ටාර්ලින්ක් (Starlink) විසින් නව සහ දැනට සිටින පාරිභෝගිකයින්ට නොමිලේ සේවාව සපයනු ලබන බවට නිවේදනය කර තිබෙනවා.
එමෙන්ම සුමාත්‍රා හි දැඩි ලෙස පීඩාවට පත් ප්‍රදේශවලට සන්නිවේදනය යථා තත්ත්වයට පත් කිරීම සඳහා ඉන්දුනීසියානු රජය සමග කටයුතු කරන අතර, ශ්‍රී ලංකා රජය සමග අමතර ආධාර ලබා දීමට ද කටයුතු කරමින් සිටින බවටයි එම සමාගම නිවේදනය කර ඇත්තේ.
දැනට සක්‍රීය පාරිභෝගිකයින් සඳහා, කිසිදු මුදලක් අවශ්‍ය නොවන බවත්, ඔවුන්ගේ ගිණුමට නොමිලේ සේවා බැර කිරීම් ස්වයංක්‍රීයව එක් කරන බවත්, සඳහන් කර තිබෙනවා.
දැනට අත්හිටුවා ඇති හෝ අක්‍රිය කර ඇති පාරිභෝගිකයින් සඳහා ද නොමිලේ සේවා බැර කිරීම් ලබා දෙන අතර, එමගින් ඔවුන්ට මෙම කාල සීමාව තුළ සේවාව නැවත සක්‍රීය කර සේවා බැර කිරීම් භාවිත කිරීමට හැකි වනු ඇති.
බලපෑමට ලක් වූ ප්‍රදේශවල නව පාරිභෝගිකයින් සඳහා ද නොමිලේ සේවාව සපයන්න බවටයි ඔවුන් සඳහන් කර ඇත්තේ.
එමෙන්ම පැකේජ මිල දී ගෙන සක්‍රීය කිරීමෙන් පසු, “ඉන්දුනීසියානු ගංවතුර ආධාර” හෝ “ශ්‍රී ලංකා ගංවතුර ආධාර” ලෙස සඳහන් කරන මෙන් එම සමාගම ඉල්ලා තිබෙනවා.
