රාජ්‍යතාන්ත්‍රික සහ ආර්ථික ඇතුළු සියලු ආකාරයේ සබඳතා ශක්තිමත් කරගැනීම සඳහා භූතානයේ රජු ජිග්මි කේසාර් නම්ගිල් ඉන්දියාවේ දෙදින සංචාරයක නිරත වී ඇතැයි විදෙස් මාධ්‍ය වාර්තා කළේය. භූතාන රැජන ජෙට්සුන් පේමා ද එක්වූ එම සංචාරයේදී ජල විදුලි බලාගාර, නාගරික සංවර්ධන, අන්තර්ජාල පහසුකම්, වෙළෙඳ, ආයෝජන සහ අභ්‍යවකාශ තාක්ෂණය සම්බන්ධව ඉන්දීය අගමැතිවරයා සමඟ සාකච්ඡා පවත්වා ඇතැයි විදෙස් මාධ්‍ය වැඩිදුරටත් වාර්තා කළේය.
එම සාකච්ඡාවේදී භූතානයේ ඉදි කෙරෙන ගලේපු නගර ව්‍යාපෘතිය පිළිබඳ වැඩි අවධානය යොමුවී ඇති අතර, පරිපූර්ණ ජීවන රටාවක් භූතානයේ ජනතාවට අත්කරදීමට නියමිත එම තිරසර සංවර්ධන ව්‍යාපෘතියට අඛණ්ඩව සහාය දෙන බව ඉන්දීය අගමැතිවරයා ප්‍රකාශ කළ බව විදෙස් මාධ්‍ය සඳහන් කළේය. වර්ග කිලෝමීටර් 2,500ක වපසරියකින් යුතු එම නගර ව්‍යාපෘතිය ඉන්දීය දේශසීමාවේ අසෑම් ප්‍රාන්තය ආසන්නයේ පිහිටි සාර්පැං දිස්ත්‍රික්කයේ ඉදි කෙරෙන අතර, ජාත්‍යන්තර ගුවන්තොටුපොළක්, ජාතික උද්‍යානයක්, වන රක්ෂිතයක් ඇතුළු ස්වභාව සෞන්දර්ය හා බැඳුණු එම නගර ව්‍යාපෘතිය භූතාන රජුගේ සංකල්පයක් අනුව ක්‍රියාත්මක වන බව වාර්තා වේ.
