පවතින කාලගුණික තත්ත්වය හේතුවෙන් දිවයිනේ බොහෝ ප්‍රදේශවල වායු ගුණාත්මක භාවය සුළු වශයෙන් අහිතකර මට්ටමක් දක්වා පහළ යා හැකි බව ජාතික ගොඩනැගිලි පර්යේෂණ සංවිධානය පවසනවා.
යාපනය හා කොළඹ නගරවල වායු ගුණාත්මකභාවය පහළ ගොස් ඇති බවත්, නුවරඑළිය හා බදුල්ල යන නගරවල වායු ගුණාත්මක දර්ශකය මධ්‍යස්ථ මට්ටමක පවතින බවයි එම සංවිධානය සඳහන් කළේ.
සාමාන්‍යයෙන් වායු දර්ශක අගය 50ට අඩුවෙන් පැවතිය යුතු නමුත්, යාපනය දිස්ත්‍රික්කයේ වායු ගුණ තත්ත්ව දර්ශක අගය 130ක් ලෙසින් ද, කොළඹ නගරයේ වායු ගුණ තත්ත්ව දර්ශක අගය 120ක් ලෙසින් ද සටහන් වන බව ජාතික ගොඩනැගිලි පර්යේෂණ සංවිධානය පවසා සිටියා.
මෙම තත්ත්වය හමුවේ ස්වසන අපහසුතා පවතී නම්, වහාම වෛද්‍ය උපදෙස් ලබා ගන්නා ලෙස මධ්‍යම පරිසර අධිකාරියේ මාධ්‍ය ප්‍රකාශක, ආචාර්ය අජිත් ගුණවර්ධන මහජනතාවට දැනුම් දෙනු ලබනවා.
