පොලිස් සැරයන්වරයකුගේ පුතෙක් වන රියැදුරකුට රථවාහන පරීක්ෂාවකදී පොලිස් නිලධාරීන් පිරිසක් අමානුෂික අයුරින් පහරදීමත්, ඒ හේතුවෙන් ශල්‍යකර්මයක් කර ඔහුගේ එක් වෘෂණ කෝෂයක් ඉවත් කිරීමට සිදුවීමත්, අදාළ ලොරි රථයේ ගමන් කරමින් සිටි අනෙක් පුද්ගලයාට පහර දීමත් සම්බන්ධයෙන් සැකපිට අත්අඩංගුවට ගෙන රිමාන්ඩ් කර සිටින මැදව්චචිය පොලිසියේ දූෂණ මර්දන අංශයේ ස්ථානාධිපතිවරයා සහ සැරයන්වරුන් සිව් දෙනා ඕනෑම ඇප කොන්දේසියක් මත මුදා හරින්නැයි මෝසමකින් නීතිඥයන් කළ ඉල්ලීමක් මැදවච්චිය මහේස්ත්‍රාත් ඉමේෂා එම්. ධර්මදාස මෙනෙවිය යළි ප්‍රතික්ෂේප කළාය.
ඒ අනුව සියලු සැකකරුවන් මේ මස 12 වැනි දින (හෙට) දක්වා යළි රිමාන්ඩ් කරන ලෙසට ද මහේස්ත්‍රාත්වරිය නියෝග කළාය. ජ්‍යෙෂ්ඨ නීතිඥ සජීව ගුණරත්න මහතා මෝසමකින් කළ ඉල්ලීම මෙලෙස ප්‍රතික්ෂේප කෙරිණි. පසුව යළි රිමාන්ඩ් කළේ මැදව්චචිය පොලිසියේ දූෂණ මර්දන අංශයේ හිටපු ස්ථානාධිපති උපපොලිස් පරීක්ෂක ඒ. දිනේෂ් මධුසංක, සැරයන්වරුන් වන ආර්. අජන්ත රණසිංහ, නිශ්ශංක ගුණතිලක, මැදවච්චිය පොලිසියේ රථවාහන අංශයට අනුයුක්තව සේවය කළ පොලිස් සැරයන්වරුන් දෙදෙනකු වන මැදවච්චිය පූනෑව පලුගොල්ලෑව පදිංචි එස්. රෝහණ සමන්ත සේනානායක සහ මැදවච්චිය ඇටවීරගොල්ලෑව ඇතාකඩ පදිංචි එස්. කපිල ජගත් සෙනෙවිරත්න යන සැකකරුවන්ය.
පැමිණිල්ල වෙනුවෙන් අපරාධ පරීක්ෂණ දෙපාර්තමේන්තුව භාර නියෝජ්‍ය පොලිස්පති රෝහණ ප්‍රේමරත්න මහතාගේ උපදෙස් මත එම දෙපාර්තමේන්තුවේ නිලධාරීහු පෙනී සිටියහ. පළමු සහ දෙවන සැකකරුවන් වෙනුවෙන් නීතිඥ භාග්‍ය ශ්‍රී හේරත් මහතා පෙනී සිටි අතර, තුන් වන සහ හතර වන සැකකරුවන් වෙනුවෙන් ජ්‍යෙෂ්ඨ නීතිඥ සජීව ගුණරත්න මහතා පෙනී සිටියේය. අගතියට පත් පාර්ශ්වයේ අයිතිවාසිකම් වෙනුවෙන් ජ්‍යෙෂ්ඨ නීතිඥ අරවින්ද හබක්කල මහතා පෙනී සිටි අතර, නිරීක්ෂණ පාර්ශ්වයක් ලෙස ශ්‍රී ලංකා නීතිඥ සංගමය වෙනුවෙන් එම සංගමයේ සභාපති ජනාධිපති නීතිඥ කෞෂල්‍ය නවරත්න සහ උප සභාපති ජනාධිපති නීතිඥ නලින්ද ඉන්ද්‍රතිස්ස මහත්වරුන්ගේ උපදෙස් මත නීතිඥ චතුර ධනංජය රණතුංග මහතා පෙනී සිටියේය.
අනුරාධපුර ශික්ෂණ රෝහලේ දී මෙලෙස ශල්‍යකර්මයක් සිදු කළේ මැදවච්චිය, තුලාවෙල්ලිය පදිංචිකරුවකු වන එම්. ආර්. දිලීෂ සංගීත් රූපසිංහ නමැති 23 හැවිරිදි තරුණයාටයි. ඔහු මැදවච්චිය පොලිසියේ සේවය කරන පොලිස් සැරයන්වරයකුගේ පුතෙකි.
