ඉන්දීය මහමැතිවරණයේදී අන්ද්‍රා ප්‍රාන්තයෙන් ආසන 16ක් ජයගත් තෙළිඟු දේසම් පක්ෂයට නව රජයේ අමාත්‍ය ධුර 5ක් අවශ්‍ය බව එම පක්ෂයේ නායක චන්ද්‍රබාබු නායිදු භාරතීය ජනතා පක්ෂ සන්ධානයේ නායක නරේන්ද්‍ර මෝදිගෙන් ඉල්ලා ඇතැයි ඉන්දීය මාධ්‍ය වාර්තා කළේය. මීට අමතරව ආසන 12ක් ජයගත් ජනතා දාල් (එක්සත්) පක්ෂයට අමාත්‍ය ධුර 3ක් අපේක්ෂාවෙන් පසුවන බව ද එරට මාධ්‍ය සඳහන් කළේය.
ජාතික ප්‍රජාතන්ත්‍රවාදී සන්ධානය ලෙස ඉන්දියාවේ නව රජයක් පිහිටුවීමට භාරතීය ජනතා පක්ෂය සහ හවුල් පක්ෂ එකමුතුව තීරණය කර ඇති අතර, එම සන්ධානයේ නායකයා සහ අගමැතිවරයා ලෙස නරේන්ද්‍ර මෝදි නම් කිරීමට ද ඒකමතිකව තීන්දු කර ඇත. භාරතීය ජනතා පක්ෂ සන්ධානයේ නව රජය පිහිටුවීම සහ අගමැතිවරයා ලෙස තුන්වැනි වරටත් නරේන්ද්‍ර මෝදි පත්වීම හෙට (8) සිදු කිරීමට නියමිතව තිබුණද, නව රජයේ අමාත්‍ය ධුර සහ සෙසු වරප්‍රසාද සම්බන්ධව එම සන්ධානයේ නායකයන් අතර ඊයේ දිනයේදීත් සාකච්ඡා පැවැති බව එරට මාධ්‍ය සඳහන් කළේය. ඉන්දියාවේ රජුන් තනන්නෝ ලෙස ප්‍රකට තෙළිඟු දේසම් පක්ෂයේ සහ ජනතා දාල් පක්ෂයේ නායකයන්ගේ ඉල්ලීමට භාරතීය ජනතා පක්ෂ සන්ධානයේ එකඟතාව ඊයේ වන තුරු පළ වී නොතිබූ බව ද වාර්තා වේ.
මෙවර ඉන්දීය මැතිවරණයේදී තනි පක්ෂයක් ලෙස ආසන 300 සීමාව පසු කිරීමටත්, පාර්ලිමේන්තුවේ බහුතරය අත්කර ගැනීමටත් භාරතීය ජනතා පක්ෂය බලාපොරොත්තු වූවද, ආසන 240ක් පමණක් ලැබීමෙන් රජයක් පිහිටුවීමට අවශ්‍ය ආසන 272 සම්පූර්ණ කිරීමට නොහැකි විය. ඒ අනුව ජාතික ප්‍රජාතන්ත්‍රවාදී සන්ධානය ලෙස මැතිවරණයට ඉදිරිපත් වූ සෙසු පක්ෂ සමඟ එක්ව පාර්ලිමේන්තු ආසන 293ක් සම්පූර්ණ කරමින් නව රජයක් පිහිටුවීමට තීරණය කර තිබේ.
