චීන-ශ්‍රී ලංකා සංස්කෘතික හුවමාරු වැඩසටහන් සහ ආයෝජන වරම් නැංවීමට චීන දූත පිරිසක් මෙරටට

චීනයේ වූහාන්, ෆුජියෑන්, ෂියාමන් සහ අංහුයි පළාත් නියෝජනය කරමින් දූත පිරිසක් සහ බුද්ධ ශාසන ආගමික හා සංස්කෘතික කටයුතු ඇමැති විදුර වික්‍රමනායක මහතා අතර හමුවක් පසුගියදා (24) බුද්ධශාසන අමාත්‍යංශ පරිශ්‍රයේදී පැවැත්විණි.
චීනය හා ශ්‍රී ලංකාව අතර සංස්කෘතික හුවමාරු වැඩසටහන් සහ ආයෝජන අවස්ථා වැඩි දියුණු කිරීම මේ හමුවේ ප්‍රධාන වශයෙන් සාකච්ඡා කෙරිණි.
එහිදී මෙරට චීන සංස්කෘතික මධ්‍යස්ථානයක් ආරම්භ කිරීමටත්, චීනය හා මෙරට අතර බෞද්ධ සංචාරක ව්‍යාපෘතියක් ආරම්භ කිරීමටත්, ව්‍යාපාරික ආයෝජන ව්‍යාපෘති ආරම්භ කිරීමටත් බලාපොරොත්තු වන බව දූත පිරිස ඇමැතිවරයා සමඟ ප්‍රකාශ කළහ.
ශ්‍රී ලංකාව මේ වන විට පත්වී ඇති ආර්ථික අර්බුදයෙන් ගොඩගැනීම සඳහා ආයෝජන අවස්ථා ඇති කිරීම ද මෙහි මූලික අරමුණක් බව චීන දූත පිරිස එහිදී වැඩිදුරටත් පැවසූහ.
මේ සියලුම වැඩසටහන් සඳහා අවශ්‍ය සහයෝගය බුද්ධ ශාසන ආගමික හා සංස්කෘතික කටයුතු අමාත්‍යාංශය මඟින් ලබා දීමට බලාපොරොත්තු වන බව ඇමැති විදුර වික්‍රමනායක මහතා එහිදී සඳහන් කළේය.
එමෙන්ම මේ චීන දූත පිරිස මේ වන විට මෙරට භික්ෂූන් වහන්සේලාට අවශ්‍ය බෙහෙත් ලබා ගැනීමට ආධාර වැඩසටහනකට ද සම්බන්ධ වී කටයුතු කරමින් සිටින බව වැඩිදුරටත් සඳහන් කළහ.
අත්තනගල්ල රජමහා විහාරයේ විහාරාධිකාරී වජිරඤාණ හිමි, චීනයේ ප්‍රධාන විහාරස්ථාන දෙකක භික්‍ෂුණීන් වහන්සේලා දෙනමක්, චීන සංස්කෘතික ආයතනවල නියෝජිතයෝ ඇතුළු පිරිසක් මේ අවස්ථාවට එක්වූහ.

Leave a Reply

Your email address will not be published. Required fields are marked *